नैं-नैं चोटि खुज्याँण मा लग्यूँ च निम उत्तरकाशी, रोजगार अर पर्यटन बढ़ाण कु हूँण छन पर्यास

मीडिया लाइव, उत्तरकाशी: उत्तराखंड राज्य म यखकु माटु-पाणी अर ज्वनी यख कि काम नि  औंदि. पर अब याँ खुणि कुछ ठोस पर्यास हूँण बटिगीं इन लगणु च कि अब पाड़ पाड़जनो तैं रोजी-रोटी बि द्याला. याँ खुणी उत्तरकाशी कु  नेहरू पर्वता रोहण संस्थान का प्रिंसिपल कर्नल अमित बिष्ट का देख रेख म कुछ ठोस काम हूंद  दिखेणु च. उ स्थानीय युवाओं तैं याँ खुणी प्रशिक्षण दे के तैयार कना छन, जो कि एक भलि कोशिश लगणी च. त ल्या पढ़ा पूरी रिपोट:

उत्तराखंड मा स्थानीय स्तर फर पर्यटन अर पर्वतारोहण मा भागीदारी बढ़ोणो खातिर नेहरू पर्वतारोहण संस्थान उत्तरकाशी न हर्षिल छोलामी मा  एक इन चूलेंकि (शिखर), जैका  नौं तक कि जानकारी नि, अर आज तक वख  क्वी चढ़ी कि नि गै छौ, तांकि अबि तक क्वी पछ्यांण नि छै. पर पैलि दाँ 28 जून खुणी एनआईएम का पर्वतारोहण दल तै यख चढ़ण  मा सफलता मिलिगे. संस्थान का छै सदस्यीय दला न इत्वार खूणी हर्षिल छोलकी मा स्थित 4823 मीटरा ऊँचैं वळी ईं अनाम चोटि फर सफल चढै करि. दला मा निम का प्रिंसिपल कर्नल अमित बिष्ट सेना मेडल, का नेतृत्व मा यू अभियान पुरु कैरि.

नेहरू पर्वता रोहण संस्थाना न पोरुं साल (पिछिला) साल नवम्बर मा उत्तरकाशी जिला प्रशासन अर  आपदा प्रबंधन बल का दगड़ी मीलिके ये अभियानों शुर्वात कैरि. तब मुख्यमंत्री त्रिवेंद्र सिंह रावत न हैरी झंडी दिखैकि याँ कि शुर्वात कैरि छै, पर वै बगत भारी ह्युं पड़ण (बर्फवारी) का वजै से यु अभियान वखि मा रोकणु पोड़ि. वखि निम न जून बटि दुबरा ये अभियान कि शुर्वात कैरि अर 28 जून इत्वारौं तैं सुबेर 9 बजि बिना नौ अर अनारोहित ईं चोटि फर (4823मी.) सफलता पूर्वक चढ़ै कैरि.

जन कि सब जणदा छा पिछलि साल  मा हर्षिल एप्पल फेस्टिबल का दौं जिला प्रशासन ल हर्षिल ग्राम सभा वर हर्षिल इको पर्यटन समिति कि मांग फर घाटी मा छोलमी गौं  का ऐंच पंचमुखी महा देव की ढैया मा स्थित बिना नौ कि यीं चोटि म पैलि ये अभियान तै शुरू करि गे छौ. संस्थान का तरफ बटि जौं पर्वतारोहियों न सफलता का दगड़ी आरोहण कैरि वैमा टीम लीडर का तौर पर कर्नल अमित बिष्ट (सेना मेडल), ले.कर्नल योगेश धूमल, उप लीडर, सूबेदार- चतर सिंह (प्रशिक्षक), हवलदार थिलनैस ग्याल्पो (प्रशिक्षक) , शिव सिंह पंवार (प्रशिक्षक), सौरभ सिंह (प्रशिक्षक) शामिल रहे. यू द्वी लोग धराली अर जसपुर गौं का छन जौं तै ये दल मा शामिल करें  ग्याई.