भलि खबर-सार: सतपाल महाराज अर अमृता रौत कोरोना बिमरि से ठिक ह्वेगेंनि

मीडिया लाइव, देरादूण: उत्तराखंड म कोरोना बिमरी सरा-सरि  खुटा पसरणी च। याँ के बीच म आज ऐत्वार खूणी एक भलि ख़बर-सार ऐग्या। भौत दिनूं बटी सरण्या बिमरि कोरोना हूण से दिक्क हुयां कैबिनेट मंत्री सतपाल महाराज अर ऊंकि जननि पैल्या मंत्री अमृता रौत भला ह्वे गेनि। यूं दुया जणो तै 14 दिन पैलि अस्पताळ बटी डाक्टरूंल घौर फटेयालु छौ। युंका सैरी कुटुमदरि कि रिपोट आज निगेटिव ऐग्या।

बात इन च की माराज कि सरा कुटमदरि फर कोरोना सैरि ग्या छै, ज्यां से उत्तराखंड म भौत घपरोळ मचि गे छौ। पर अब सब ठिक ह्वे ग्या। यीं ख़बरसार का आणा क बाद ऊँका दुन्याभर म फैल्याँ भग्तगण अर राजनीतिक पार्टी का कार्यकर्ता अर चाँणदरा भौत खुश छन। दरसल बात इन च कि जब सैरा देश अर दुन्याभर म लोकडौन ह्वे छौ, वेक बीच म बल उत्तराखंड का धर्मस्व, पर्यटन अर सिंचाई मंत्री सतपाल माराज उंकी जननी अर द्वी नौना अर ब्वारी गरीब गुरबौं कि मदद करणा छै। याँकै  बीच कुछ लोग ऊँका घौर बि आई छन। यीं आपाधापी म महाराज कु सैर्यू कुटम बिमार ह्वेगे छौ। अब सब ठिक ह्वेगिनी। ऊँका नौना ब्वारी त पैली घौर ऐगे छा। पर माराज अर अमृता रौत तै 17 दिन एम्स ऋषिकेश म भर्ती रौंण पोड़ छै, वांका बाद ऊंथै 14 दिन खुणी होम कोरन्टीन म रैंणा कि डाक्टरूंल सला दे छै। ज्यांक बाद आज उँकी रिपोट निगेटिव ऐग्या। याँ का बाद माराज कि सर्या कुटमदरिल प्रशासन डाक्टरूं, पार्टी अर अपणा चणदरूं खुणी जुगराज रैयाँ बोलि।