पौड़ी गढ़वाल मा गौं-गौं जैकी युवाओं तैं पर्यटन स्वरोजगार की जानकारी दिए जाणी

मीडिया लाइव, देहरादून: अब पौड़ी जिला मा बोंण बटि घौर बॉडी अयाँ जवान नौना-नौन्यू कु  अपणी रोजी-रुट्टी(स्वरोजगार) की व्यवस्था करणा खुणी राज्य सरकार का पर्यटन विभाग का बटि चलए जाण वळी जरूरि योजना पं.दीनदयाल उपाध्याद होम स्टे अर वीर चन्द्र सिंह गढ़वळी  पर्यटन विकास वाहन व गैर वाहन योजना कु भिंडी से भिंडी लोकों तैं फैदा दिलाण कु खातिर

जिल्ला का पर्यटन विकास अधिकारी व साहसिक खेल अधिकारी खुशाल सिंह नेगी ल दगड़ी बाकी अफसरों दगड़ी एकेश्वर ब्लॉक का कई गौं-गौं मा जैके लोकूँ दगड़ी बातचित करि. अर गौं का लोकूँ तै बोलि कि अपणा नजदीक मा स्वरोजगार की दिशा मा करणा खुणी सरकारी योजनाओं का बरामा जानकारी दे. दगड़ी ये बि बतये ग्या कि कनिके कि याँ खुणी ऑनलाइन फॉर्म भरण. वे बगत ऊँका दगड मा इलका का ब्लॉक प्रमुख बि छाई अर बाकि स्थानीय जनप्रतिनिधि भी छाई. क्षेत्र का किर्खू, मासौं, नेली, नौगांवखाळ , विंजोली, एकेश्वर, सिमारखाल दगड़ी कतगई गौं कु  मा घूमके लोकूँ दगड़ी सम्पर्क करे गे. सरकार कि  स्वरोजगार योजना का बारा मा बारीकी से बतएगे.

याँ मा खास करि के  पं.दीनदयाल उपाध्याय होमस्टे मा अपणा पुरणा पितरौं कि कूड़ी तैं ठिक कैरि के पर्यटकों कि सविधा का हिसाब से भितर बणाई के होम स्टे मा दर्ज करणा बारा मा पूरी बात समझाई.यीं योजना क तहत नै होमस्टे बणाण का बारामा पूरी बात बताई.  याँ का अलावा सबसे जरूरी बात योजना लीण खुणी कागजात तैयार करणा का बारा मा बतएगे अर लोन लीण खुणी बैंक बटि 10 लाख तक अनुदान दिए जाण का बारा मा बोलि. ऊँल इलाका का धार्मिक व खास जगों कु रस्ता मा पर्यटको का घुमण-फिरण  खु णी ऊँ जगों तै ठिक ठाक करणा की बात बोलि अर अपणी  लोक संस्कृति व विरासत कि शैली मा सुविधा अनुसार होमस्टे बणाण खुणी बोलि.ये मौका पर ब्लॉक प्रमुख नीरज पांथरी, क्षेत्र पंचायत सदस्य रजना बडोला, ग्राम प्रधान चन्द्र मोहन बडोला, तेजपाल सिह पंवार, सुभाष चंद्र, नरेन्द्र सिह, साबर सिह, देवेन्द्र सिह, मनवीर सिह, मनोरमा राणा, हितेश सिंह नेगी एव सुरेश सिंह सहित अन्य जनप्रतिनिधि एवं ग्रामीण वख ऊँका दगड़ी छाई।