उत्तराखण्ड म 2823 फर सैरिगे अबि तक कोरोना, 38 मनख्यूं कि चलि गे ज्याँन

मीडिया लाइव, देरादूण: राज्य म कोरोना बिमरि भौत सरासरी सरणी च. आज ऐत्वार क दिन त कम केस पॉजिटिव ऐन बिमरी सरण्या वलूँक. जौंकि संख्या 32 बतैएगे.यांक दगड़ी राज्य म कुल कोरोना सरण्यों की संख्या 2823 ह्वेगे. बुरी खबर अर डरौंण वळी बात या च कि यख यीं मामारी म 38 लोगुन अपणी ज्यांन ख्वे दे.

राज्य कोरोना कण्ट्रोल भितर बटी या खबर आज राति 7 बजि बतएगे. ज्यांम बतएगे कि आज 106 लोग यीं मामारी से लैड़िके ठिक ह्वेकि आज अपण द्याळ-घौर चलि गेनी.अबि तक यख सबि मिलैकि 2018 बिमार ठिक ह्वेगेनी. अबि 779 लोकूँ कु इलाज चलणु च. आज 974 जांच कि रिपोट निगेटिव ऐनि. जबकि 559 नै सैम्पल टेस्ट खुणी भेजेगे. राज्य म ठिक हूणं की रिपोट भी रोजना बढणी च जो भलि बात च.

आज जौं जिलौं म सरण्या बीमार मिलिन ऊंमा नैनिताल म-14,देरादूण म-10, टीरि म-4 चमोळी म- 2, चम्पावत म-1, रुद्रपर्याग म बि 1 मरीज मिलि आज. कुल मिलै कि 32 सैत 2823 ह्वेगेनि.